Sepia

[From my Grandfather's Notebook]

Buller

Ye ane-time faithfu’, lovin’ baist.
In ma opinion ye’re disgraced
Sin’ ye hae yer affections placed
Wi’ Dame Buchanan.
Yer new-developed kin’ o’ taste
Taks understan’in.

Och, dug, wad ye no’ sooner hae
The kin’ o’ sport we used tae play,
Tae poach a’ nicht an’ sleep a’ day,
Content wi’ me,
Than bein’ a pet companion tae
A very ‘She’?

Ah’ve seen the day ye’d tak yer dose
O’ kail an’ tatties, aye, an’ brose –
Bit noo ye winna pit yer nose
Tae sic guid feedin’.
Thae trashy sweetstuffs, Ah suppose,
Hae sp’ilt yer breedin’.

Bit still, Ah’m telt that Mrs. B.
Is guid o’ he’rt an’ fond o’ ye.
An’ that ye baith gey weel agree
Wi’ ane anither;
Sae, gin ye like her mair nor me,
Bide ye thegither.

[For an image of Buller, click here]

posted by Chameleon @ 9:28 AM
|